Kargua utzi du Sartagudako alkate Beatriz Santos Belinchonek (PSN). Sare sozialetan zabaldutako gutun ireki baten bidez egin du hori, etxeko argindar kontagailua trukatua zuela argitara atera ostean. Ez da herrian antzeman duten irregulartasun bakarra: beste 30 bat lagunek ere argindar sare publikora lotuta zeukaten kontagailua. Auzia argitara aterata, dimisioa ematea erabaki du alkateak.
Gutunean, Santosek esan du kargua uztea erabaki «zaila» izan dela, baina alkateari dagokiola «eredugarri izatea» eta horregatik «onartu» egiten duela «oker» eginikoa: «Okerra onartzea eta politikaren lehen lerrotik aldentzea dagokit orain». Barkamena ere eskatu die herritarrei, bereziki harekin «desilusionatuta» daudenei, baina lasaitasun mezua ere helarazi die: «Udalean egin dudan lana eredugarria izan da, eta dena dago udaletxean erregistratuta».
Aurrera begira, Santosek esan du «Sartagudaren alde lanean» segituko duela: «Baina orain dagokidan tokitik».
Udalbatzan, bost ordezkari ditu PSNk, eta lau EH Bilduk. Hain zuzen, koalizio independentistak ez du polemika areagotu nahi izan, eta esan du alkateak «ongi» egin duela dimisioa aurkeztuta: «Sortu duen egoeraren ostean, hori zen egin beharrekoa. Espero dugu honek ahalik eta eragin txikiena izanen duela udalaren eguneroko jardunean. Gai oso garrantzitsuak jorratu behar dira udalean, eta guk lanean segituko dugu, herriari zor diogun konpromisoa arduraz betetzen».
