Donostiako 15 gazte aurki espetxeratu ditzaketela ohartarazi dute

Espainiako Auzitegi Gorenak aurki emango du Donostiako hamabost gazteri Auzitegi Nazionalak ezarri zien seina urteko espetxe zigorraren inguruko epaia. Gazte horien senide eta lagunek agerraldia egin zuten atzo, espetxeratuak izan litezkeela ohartarazi eta ezarri dieten «zigor politikoa» salatzeko.

Espainiako Auzitegi Nazionalak «herri honen alde lan politiko eta soziala egiteagatik eta herri honekin konprometitutako gazteak izateagatik» zigortu zituela salatu zuten. «Atxilotu, inkomunikatu eta torturatu ondoren» kartzelara sartu eta urte eta erdi eta bi urte preso egon ondoren baldintzapean aske atera zirela gogorarazi zuten, «izugarrizko bermeak ordainduta».

Gatazkaren konponbidearen bidean, «horrelako zigor politikoak ulergaitzak» direla salatu zuten, eta Euskal Herrian zabaldutako «bakerako aukeren eta konponbide demokratikoaren aurkako oztopo bat gehiago» direla nabarmendu zuten.