Ipar Euskal Herriko EAJk bat egin du Euskal Konfederazioak atzo egin zuen deiarekin. Euskalgintzako eragileek agerraldia egin zuten EEP Euskararen Erakunde Publikoa osatzen duten erakundeei eskatzeko «anbiziotsu» joka dezatela etorkizuneko hizkuntza politika definitzeko orduan. Helburu argia finkatu zuten: 2050erako euskal hiztunen kopurua %30era heltzea. «Ezinbestekoa» da jeltzaleen iritziz.
Halaber, euskararentzat koadro juridiko «egonkor eta anbiziotsua» defendatzen dutela erran dute. «Aldi berean, EEPk [Frantziako] Asanblea Nazionalera eta Senatura ekimen bat eraman behar du, aipatu eskualdeko hizkuntzen konstituzio aitorpenari buruz», adirazi dute.
Irakaskuntzan indarrak egiten segitu eta «paisaia linguistiko euskaldunagoa» bultzatzeko beharra dagoela ere erran dute. «[Frantziako] Estatuaren eta lurralde erakundeen arteko adostasunaren bidez, haien zerbitzu eta enpresa publiko guztiek frantsesarekin, eta Aturripean gaskoiarekin, euskara erabil dezaten».
