EAJren "jarrera politikoaren atzerakadak" autoderminazioaren aldekoak "kezkatu" behar lituzkeela esan du Barrenak

"Esan zituen zenbait gauzekin ados gaude, baina atzerakada bat dago EAJren jarrera politikoan, Lizarrako akordioa sinatzera eraman zuten parametroetatik oso urrun baitaude". "Atzerakadarik handiena Egibar eta Imaz bereizten dituzten puntuetan" nabarmendu dituztela esan du Barrenak, aliantza politikoak egiteko ikuspuntutik hasita: "Estatuaren pakto berri bat bilatzen du eta autodeterminazio aldarrikatzen duten eragileen artekoa".

"Autodeterminazioaren alde urratsak eman nahi ditugunok kezkatuta egon behar genuke, Imazek alderdia jartzen baitu guztiaren gainetik, eta herria uzten du bigarren mailan", azpimarratu du Batasuneko kideak.

"EAJn alderdien interesak gailendu dira"

Batasunak Bergaran egindako proposamenaren egoeraz ere galdetu diote Pernando Barrenari. Haren irudiz, "eskandalua" da "alderdiaren interesengatik" proposamen hori ez babestea, eta are gehiago ETAren agiria kontuan izanda, "guztiok ikusten baitugu hitz horien atzean su-eten eskaintza bat dagoela".

Autodeterminazioaren aldeko zerrenda bateratu bat osatuko balitz, "ezker abertzalea borondatea onekoa" izango zela nabarmendu du Barrenak, "bai zerrenden osaketan eta bere kideak zerrenda horretan ez sartzeko prest egongo litzeke ilegalizatua izateko arriskua saihesteko". Halaber, Lizarrakoa berriz ez gertatzeko "berme osagarriak bilatzearen alde" agertu da Batasunekoa, EAJren, EAren eta ezker abertzalearen artean "konfiantza" egon zedin.

Akordioa lortzen ez bada ere, ezker abertzaleak akordioa defendatzen jarraituko duela nabarmendu du, eta berak erabakiko du "nola adierazi" hauteskunde horietan "ezker abertzaleak jarraitzen" duela Batasuna legez kanpo utzi arren.