Ebaluazio eraren kontra eginiko grebak oihartzun txikia izan du Iparraldean

Hezkuntza alorreko sindikatuek grebara deitu zuten atzo Ipar Euskal Herrian. Frantziako Hezkuntzak irakasleen beste ebaluazio sistema bat ezarri nahi du plantan. Orain artean akademia ikuskariak aztertzen zituen irakasleak, eta emaitza horren arabera zuten ordainketa. Engoitik azterketa hori ikastetxeko zuzendariak egingo du, erreformaren arabera. Eskola publikoko lehen mailako irakasleen %15 inguruk egin dute bat grebarekin. Mobilizazioak epelagoak izan ziren oraindik. Goizean egindako manifestazioan 250 pertsona inguru elkarretaratu ziren Baionako karriketan. Baionako geltokitik Baiona Ttipiko Paul Bert lizeora joan ziren, ikasleek bertako sarrera blokeatu baitzuten.