1,2 milioi jarriko ditu EEP Euskararen Erakunde Publikoak; 400.000 euro Eusko Jaurlaritzako Hizkuntza Politikarako Sailburuordetzak. Bi kopuruen batura Ipar Euskal Herrian euskararen aldeko jardueretan ari diren elkarteen lana hauspotzeko izango da. 2007tik ari dira bi erakundeak elkarlanean, eta aurten, iazko kopuru bera hitzartu dute.
Elkarlan horretan segitzeko asmoa agerian utzi du Hizkuntz Politikarako sailburuorde Patxi Baztarrikak. Are gehiago, jokatzeko era hori Europako Batasunaren funtzionamendurako giltzarri dela oroitarazi du: «Euskara sustatzea euskaldunon eginkizuna da, baina eginkizun hau, eginkizun edo misio europarra ere bada, hori delako Europan eleaniztasuna sustatzeko guk egin dezakegun ekarpenik sendoena». Dei egin die, gainera, Nafarroako agintari berriei —bozen ondoren erakundeetara heldu diren gizon eta emakumeei— lehenbailehen hurbiltzeko akordioaren altzora. Izan ere, horretarako asmoa azaldu dute buruzagi berriek, eta zinetan «mesedegarria» izango dela uste du Baztarrikak.
Hitzarmen bidezko laguntzetara bideratuko dituzte 1,2 milioi, eta 360.000 euro, berriz, izango dira laguntzak lortzeko proiektu deialdiaren bidez banatzeko. Laguntzarik handiena, 440.000 euro, Seaskak jasoko du; AEKren euskalduntze eta alfabetatze sarea izango da hurrena, 355.000 eurorekin.
