Joseba Egibar EAJko GBBko presidenteak Gipuzkoako Batzar Nagusietan konfiantza mozioa eskatzeko galdegin dio Martin Garitano (Bildu) ahaldun nagusiari. Izan ere, Egibarren arabera, hondakinen auzia dela-eta atzo EAJren, PSE-EEren eta PPren botoei esker Juan Carlos Alduntzin Ingurumen diputatuaren aurkako zentsura mozioa aurrera atera ondoren foru gobernuak berdin jarraitu nahi badu, Garitanok jakin beharko luke Batzar Nagusien konfiantza baduen ala ez.
Egibarren ukatu egin du EAJk Bilduren aurkako frontea osatu duela PSErekin eta PPrekin. "Hori horrela balitz, Garitano ez zatekeen ahaldun nagusi, ezta Juan Karlos Izagirre Donostiako alkate ere".
Jose Antonio Pastor PSEko kidea eta Laura Garrido PPkoa prest azaldu dira EAJrekin batera Garitanoren kontrako zentsura mozioa aztertzeko.
Juanjo Agirrezabala EAko kideak hiru alderdi horiei Bilduren aurka aritu izana egotzi die. "Buruan Eusko Legebiltzarrerako hauteskundeetako kanpaina-aurrea baino ez dute, ez hondakinen kudeaketa".
Radio Euskadin izan dira laurak, goizean.
