Azken zazpi hilabeteetako kasu gutxien zenbatu dute Hego Euskal Herrian COVID-19a detektatzeko egindako testetan: 261 izan dira, zehazki. Nafarroako Gobernuak eta Eusko Jaurlaritzak emandako datuen arabera, joan den abuztuaren 4tik aitzina erregistratu den daturik apalena da hori. Hala eta guztiz ere, ohi denez, astegunetan baino proba gutxiago egin ziren igandean (6.119), eta, beraz, positiboen kopurua txikiagoa izan arren, aurreko egunen parekoa izan da egun bakarrean egindako testen gaineko positiboen ehunekoa; atzoko proben %4,3k eman dute positibo. Larunbatean ere %4,3 izan zen ehunekoa, 7.000 proba inguru egin eta 315 kasu zenbatuta.
Hegoaldeko lurraldeak banan-banan aztertuta, Bizkaian 116 kasu positibo atzeman dira; Gipuzkoan, berriz, 64 izan dira; Nafarroan 47 zenbatu dituzte, eta Araban, 32.
