Arantzazuko (Gipuzkoa) probintzia frantziskotarreko eliztar bat zigortu du Eliza katolikoak barne auzibide batean, sexu abusuak egiteagatik: Javier Garrido Goitia frantziskotarra. Zehazki, «mistizismo faltsua» eta «aitortzan eskaera egitea» egotzi diote frantziskotarrari. Eliza katolikoak azken izendapen hori erabiltzen du apaiz batek, aitortza egiten ari dela baliatuz, norbaiti sexu harremanak izatea proposatzen dionean.
Biktima bik aurkeztu zuten salaketa, adingabeak babesteko eta abusuak prebenitzeko Iruñeko elizbarrutiaren bulegoan. Auzia Elizaren Rotako auzitegiaren esku gelditu zen, eta hark frantziskotarraren kontrako epaia eman zuen maiatzean. Akusatuak helegitea aurkeztu zuen, eta, orain, auzitegiak berretsi egin du zigorra.
Zigorraren arabera, Garridok ezin izango du apaiz gisa jardun 95 urte bete arte. Egun, 82 urte ditu frantziskotarrak. Liburuak eta artikuluak argitaratzea debekatu diote, eta «gidaritza espiritualean» aritzea ere bai.
Iruñeko eta Tuterako elizbarrutiak «elkartasuna» agertu die biktimei, «haien osotasun pertsonal eta moralean kale handia jasan baitute», eta «konpromisoa» adierazi du haren esku dauden neurri guztiak hartzeko, helburu izanik «abusu horiek prebenitzea eta adingabeekin lan egiten dutenak prestatzea abusuak hautemateko eta prebenitzeko».
Garrido Goitia teologo ezaguna da, eta liburu ugari idatzi ditu kristautasunaz, espiritualitateaz eta Arantzazuko santutegiaz.
