Andre batek Lezoko jaietan ibili ondoren etxerako bidean jasandako sexu erasoa gaitzetsi dute hainbat herritarrek gaur arratsaldean. Asteartean, Errenteriako Udalak herriko Berdintasun Kontseiluarekin adierazpen bat onartu zuen erasoa salatzeko, eta Lezoko, Oiartzungo eta Pasaiako udalek bat egin zuten horrekin.
Adierazpen horretan jaso zutenez, "zoritxarrez jaietan ere ematen dira emakumeen aurkako erasoak". Gaineratu zuten emakumeei "independentzia eta segurtasuna" ukatzen zaiela.
Udalaren arabera, emakumeen aurkako erasoek adierazten dute gaur egungo sisteman gizon eta emakumeak oraindik ere ez daudela maila berean, eta "gizonek emakumeen gaineko botere harremana" dutela.
