Gauez etxerako bidean gertatzen diren erasoak saihesteko, aldatu egingo dute Bilbobusen arautegia: gaueko zerbitzuetan, geltokietatik kanpo ere geratu ahal izango dira autobusak, bidaiariak eskatzen duen lekuan. Bereziki emakumeen aurkako erasoei aurre egin nahi diete neurri horren bidez. Etxetik gertuago jaisteko aukera emango diete horrela.
EH Bilduk egin zuen proposamena udalean. "Kosturik gabeko" neurria dela azaldu zuen, eta "genero perspektiba" daukala. Udal gobernuak ontzat jo du EH Bilduren proposamena, eta aztertzen ari da nola ezarri martxan, eta noiz. Bilboko Udalak hilaren 25ean du osoko bilkura egitekoa, eta orduan onartuko dute neurria, Bilbobuseko araudiak aldatuta.
