Eztabaida horrek "halabeharrez" galdeketa batean amaitu behar duela adierazi du Josu Erkoreka Eusko Jaurlaritzako eledunak, TVE Espainiako telebista kate publikoan eginiko elkarrizketa batean adierazi duenez. Azaldu du EAJk mahai gainean jarri duena "autogobernu etorkizun bat, ahalik eta adostuena" dela, nortasun nazional ezberdinak aintzat hartzen dituena.
Erkorekak azaldu du ezin direla alderatu Kataluniaren eta Euskal Herriaren egoerak, ETAren jardun armatuaren amaieraren ostean "gainditu beharreko eztabaidak" daudela iritzita. Bizikidetza aipatu du bereziki. Zehaztu du erreferendum bat egitearen inguruko eztabaida ez dela "egokitzapen legalari" buruzkoa, "borondate politiko" kontua baizik. Izan ere, oroitarazi du galdeketak egiteko aukera Espainiako Konstituzioan jasotzen dela.
