Matrikulazioa etenik gabe behera doala eta eskolan curriculuma osorik lantzeko denbora soberan ez daukatela ikusita, Erlijioa ikasgaia eskolako ordutegitik kanpo uztea proposatu du EAEko Eskola Kontseiluak. Atzo batzarra egin zuten kontseiluko kideek, eta ez zuen aurkako botorik jaso 2010-2012ko txostenak. Kristau Eskolek ere babestu dute ebazpena, kontseiluko presidente Maria Luisa Garcia Gurrutxagaren arabera. Hori gezurtatu egin dute Kristau Eskolek ohar baten bidez, eta esan dute proposamenaren kontra daudela.
Finean, Batxilergoan orain arte jarraitutako bidea orokortzearen alde egin du kontseiluak; hots, eskolei askatasuna ematea ikasgai hori ordutegian nola finkatu erabakitzeko, derrigorrezko ordutegitik at —eguerdian edo arratsaldean jartzea aipatu dute—.
Kontuan izatekoa da Batxilergoan martxan jarritako eredu hori atzera bota duela Espainiako Auzitegi Gorenak, Gasteizko, Bilboko eta Donostiako elizbarrutietako gotzainek auzitara jo eta gero. Datorren ikasturtean, ohiko ordutegiaren barruan eman beharko dute erlijioa institutu guztietan.
Gomendio sorta luzea egin dio Eskola Kontseiluak Jaurlaritzako Hezkuntza Sailari. Baliabideei buruz luze ari da txostena. Behin eta berriz ohartarazi dute krisiarekin eskasten ari direla ikasleen baldintzak, eta nabarmendu dute hezkuntzak zeregina daukala ikasleen arteko desoreka horiek berditzeko. Baliabideei eustea ezinbestekoa dela uste dute horregatik.
Ikasle etorkinei buruzko gomendio bat badago tartean. Estudiante atzerritarrak "modu orekatuagoan" banatzeko eskatu dute.
Espainiako Gobernuaren hezkuntza erreformaren aurkako aldarria berretsi du eskola kontseiluak, eta nabarmendu du "lidergoa" egitea Jaurlaritzaren lana dela.
