Atzeraldi bat planteatu du Mariano Rajoyk Espainiako Kongresuan. Gobernuburu izendatzeko eztabaida saioa egiten ari dira, eta PSOEk bota dio amua: errebalidak geratzeko asmoa iragar dezala. Erantzun txandan eman du albistea Rajoyk: errebalidek ez dute zuzeneko eragin akademikorik izango oraingoz. Alegia, titulua berdin jasoko dute ikasleek, nahiz eta azterketa hori ez pasatu.
Azken finean, Rajoyren proposamena da aurtengo sistema datozen ikasturteetara hedatzea, harik eta Madrilen “hezkuntzako akordio nazionala” adosten duten arte. Aurten, izan ere, teorian egitekoak dituzte DBHko eta Batxilergoko azken azterketak, baina ez dute balioko titulua eskuratzeko; salbuespen gisa jaso zuten hori LOMCEn, lehen urtea izanik titulua lortzeko giltzarri ez izatea errebalidak. Hori luzatu egingo dute, beraz.
Batxilergoko azterketak, bai, izango du eragin akademiko bat: unibertsitaterako sarbidea arautuko du. Azken finean, orain selektibitateak egiten duen funtzioa beteko du. Akordioa lortu arte horrela segituko dutela azaldu du Rajoyk: “Ordura arte, Batxilergoko amaierako ebaluazioa ez da ezinbesteko izango titulua lortzeko, eta soil-soilik unibertsitatera sartzeko balioko du”.
