Alberto Ruiz Gallardon Espainiako Justizia ministroak eta Jorge Fernandez Diaz Barne ministroak azaldu dute gobernuak "errespetatu eta onartu" egiten duela Sortu legeztatzeko Auzitegi Konstituzionalak hartu duen erabakiarekin, baina ez duela bat egiten. "Neuri gustatuko litzaidakeena da Konstituzionalak Gorenaren erabakiari eustea eta, beraz, Sortu legezkoa ez izatea", esan du Gallardodek. Antzekoa adierazi du Fernandez Diazek.
Konstituzionalaren sententzia osorik ezagutu nahi dutela esan du Justizia ministroak, hemendik aurrera gobernuaren jokabidearen mugak zeintzuk izan daitezkeen aztertzeko.
Espainiako exekutiboak "terrorismoaren aurkako borroka etengabea eta zalantzarik gabekoa" duela berretsi du Gallardonek, eta Barne ministroak ezker abertzaleari, "Sorturekin edo gabe, terrorismoa gaitzesteko, barkamena eskatzeko eta ETAri baldintzarik gabe desegiteko" eskatzeko galdegin dio.
EAEk PPk esan du erabakia ez dela ETAren desagerpenerako lagungarri
Iñaki Oiarzabal EAEko PPko idazkari nagusiak adierazi du auzitegiaren erabakia ez dela ETAren desagerpena lortzeko lagungarri. "ETA desegitea falta da, armak entregatzea eta eragindako mina aitortzea. Hori gertatzen ez den bitartean, era honetako legeztatzeak ez du ekarpenik egiten norabide horretan".
