Aitzina gazte erakundeko hainbat kide Espainiak Baionan duen kontsulatuaren balkoi batera igo dira gaur goizean Altsasuko auziko epaia salatzeko. Gaurko atxiloketen berri izan ondoren burutu dute ekintza hori. Zortzi gazte balkoietako batera igo dira Altsasuko zortzi gazte auzipetuen irudiak eskuan hartuta, eta beste sei behean kontzentratu dira 'Altsasukoak aske' leloa zuen pankarta eskuetan hartuta.
"Utzi bakean Altsasu! Utzi bakean Euskal Euskal Herria!", idatzi du Aitzinak Twittereko bere kontuak. Frantziako Polizia agertu da eta gazteak kontsulatutik jaitsiarazi dituzte.
Aintzinaz gain, goizen hainbat izan dira gaurko atxiloketak salatu dituzten Euskal Herriko erakundeak. Nafarroako Gobernuak "desproportzioa" gaitzetsi du. Altsasuko alkateak "justizia" eskatu du. Otegik dio "estatu aparatu guztiak bota" behar direla Euskal Herritik. Geroa Bai eta Ahal Dugu ere, atxiloketen aurka.
Jaurlaritzak, berriz, epaia errespetatzen duela nabarmendu du eta adierazi ados ez dagoenak baduela aukera helegitea jartzeko. Horretaz gain, gogorarazi du bere garaian salatu zuela "gehiegizkoa" zela gazteak "terrorismoagatik" auzipetzea. "Dena den, beldur hori ez da bete, epaian ez delako terrorismo deliturik aipatzen".
Ana Ollo Nafarroako Gobernuko eledunak auzian "desproportzioak" jarraitzen duela salatu du Iruñean, hedabideen aurrean. "Justizia ez bada proportzionala, injustizian bilakatzen da". Ollok ez du argitu Nafarroako Gobernua hilaren 16ko manifestazioan izango denik.
Javier Ollo Altsasuko alkateak esan du Udal Bozeramaileen Batzordearen bilera egingo dutela gaur. "Orain arteko posizioarekin jarraituko dugu: proportzionaltasuna eskatuko dugu, eta, hori eskatzean, justizia eskatuko dugu. Atxiloketa hauen kontra gaude".
Arnaldo Otegi EH Bilduko koordinatzaileak Twitterren idatzi du "neofrankistak" Espainiako gobernutik ateratzea ez dela nahikoa. "Estatu aparatu guztiak gure herritik bota behar dira". Besarkada bat bidali die atxilotuei eta familiei. "Zertarako gai garen erakutsiko diegu berriro igandean [giza katean]".
Unai Hualde Geroa Baiko parlamentariak salatu du "lotsagarriak" direlako Altsasuko atxilokerak. "Herria berriz ere injustiziaren gunea da. Operazioa propaganda da eta ez da beharrezkoa".
Joseba Asiron Iruñeko alkateak ere esan du gaur berriro ikusi dela "erabateko desproportzioa" dagoela auzian. "Herritarrek ez dute hori irensten".
Maddalen Iriarte EH Bilduko legebiltzarkidearen ustez, Espainiak euskal herritarrei ez die Justizia modu berean ezartzen. Altsasuko auzia "injustizia" dela adierazi du Gasteizen, Eusko Legebiltzarrean hedabideen aurrean., eta "elkartasuna" agertu die atxilotuei eta haien senideei. "Benetako helburua ez da justizia, baizik eta mendekua".
EAEko Ahal Dugu-ren iritziz, auziak "kalean indignazioa" eragiten du, "herritarren parte batek ez baitu ulertzen". Haren arabera, auzipetuen aurka hainbat eskubide urratu da auzibidean.
