Europako Kontseiluko lehendakari Herman Van Rompuyk berretsi egin du zein jarrera hartuko lukeen bera buru duen kontseiluak Katalunia estatu gisa egituratuko balitz. "Hitzarmenak estatuei aplikatzen zaizkie. Zati batek estatu kide batekoa izateari uzten badio, ez zaizkio hitzarmenak ezartzen", azaldu du Van Rompuyk.
Mariano Rajoy Espainiako Gobernuko presidentearekin batera egin du agerraldia Van Rompuyk. Gogorarazi duenez, estatu bat Europako Batasunean sartzeko estatu kide guztien oniritzia behar du, eta batasunaren alde egin du: "Neure herrian beti egon izan naiz separatismo ororen aurka".
