ETAri trenaren auzian ez esku hartzeko «exijitu» dio AHTren Aurkako Asanbladak

AHTren Aurkako Asanbladak argi dauka zeintzuk diren tren lasterraren kontrako proiektuari aurre egiteko bitartekoak, eta bitarteko horien aldeko apustua berretsi du. «Egitasmoaren ondorio kaltegarriei buruzko informazioa zabaltzea, desobedientzia zibila, ekintza zuzena eta mobilizazio masiboak» erabiltzen dituzte AHTren proiektua geldi dezatela eskatzeko, eta ez dute onartzen ETAk auzi horretan esku hartzerik. «ETAri gatazka honetan ez esku hartzeko exijitzen diogu», adierazi du AHTren Aurkako Asanbladak, hedabideetara igorri duen adierazpen batean.

AHTren Aurkako Asanbladak, ordea, ez du nahi ETAri eginiko eskaria «terrorismoaren kontrako politikari» adierazitako babes moduan ulertzea. Aitzitik, «AHTren inposizioa gelditzeko borroka moldeen zilegitasunari buruzko hausnarketa zabaltzeko eta herri mugimenduaren autonomiari eusteko asmoari» erantzuten dio euren eskaerak.

Aldi berean, trenaren proiektua «egintza bururatuen bidez ezartzea» egotzi die Asanbladak agintari politikoei eta enpresariei, baita helburu hori lortzeko proiektuaren ondorioak ezkutatzea, «intoxikazio informatiboa» baliatzea, proiektuaren kontra daudenei poliziaren bidez «jazartzea», obrak «militarizatzea» eta gizarteak egitasmoari erakutsi dion desadostasuna ezkutatzea ere. Horren harira, ETAk egindako atentatua ez erabiltzeko eskatu du: «Inork ez dezala erabili Inazio Uriaren hilketa AHT inposatzeko asmoa indartzeko».

Abiadura handiko trenaren kontrako mugimendua kriminalizatzeari buruz ere jardun da Asanblada. Dioenez, hedabideek hasieratik mespretxatu eta desitxuratu dute AHTren kontrako borroka, eta hori areagotu egin da joan den astetik. «Asmo zeken eta sarraskijale batzuek mugituta, AHTren aurkako oposizioari nola edo ahala prestigioa kentzeko eta hura kriminalizatzeko asmoz, kanpaina intoxikatzaile batean murgildu dira».

Abiadura handiko trena, hala ere, «gure herrian inoiz planteatu den azpiegitura suntsitzaileena» dela berretsi du Asanbladak, eta «behin betiko gelditzea lortu arte» eguneroko borrokan parte hartzera eta era aktiboan engaiatzera deitu du euskal gizartea.

AHTren Aurkako Asanbladak hamabost urte daramatza tren lasterraren kontrako borrokan, eta ibilbide horretan erabili dituzten borroka moldeekin jarraitzeko borondatea agertu du bere adierazpenean.