Gainontzean, bederatzi euskal herritarrek lortu dute Europako Legebiltzarrean egoteko aukera: PSOEko Ramon Jauregi, Eider Gardiazabal eta Iratxe Garciak, PPko Jaime Mayor Oreja, Carlos Iturgaitz eta Pablo Zalbak, UMPko Alain Lamassourek, EAJko Izaskun Bilbaok eta Aralarreko Inaki Irazabalbeitiak. Edozein kasutan, Aralarreko ordezkaria ez da bost urteko legegintzaldian izango europarlamentari. Bederatzi bat hilabetetarako izango du postua. Independentistak eta Ezkertiarrak koalizioan aurkeztu zen Aralar, besteak beste EArekin eta ERC zein BNGrekin. Kataluniarrekin eta galegoekin partekatu beharko du kargua Irazabalbeitiak, nork bere herrian lortutako botoen arabera. Bederatzi bat hilabetez izango da parlamentari.
Ipar Euskal Herrian abstentzioa %3 gutxitu bada ere, oro har, oso handia izan da abstentzioa. Hego Euskal Herrian, inoiz ezagutu gabekoa: %59, duela bost urtekoa baino %4 handiagoa. Eta, abstentzio handiaren eraginez, alderdi guztiek egin dute behera jasotako boto kopuruetan, bai martxoko hauteskundeekin bai duela bost urteko Europarakoekin alderatuta. Guztiek, ezker abertzaleak babestutako II-HEk izan ezik.
Legez kanporatzearen eraginez, ezker abertzaleak ez du bere hautagaitza aurkezteko aukerarik izan. Baina II-HEren zerrendaren alde bozkatzera deitu zuen. Ezker abertzaleak sustatu eta Espainiako auzitegiek baliogabetutako zerrendek martxoko eta 2004ko hauteskundeetan jasotako boto kopuruari erreparatuta, jende gehiagok babestu du II-HEren zerrenda. Eta bakarra izan da. 138.266 boto jaso ditu Hego Euskal Herrian. Duela bost urte baino 34.000 gehiago.
Babes gutxiago jaso dutenen artean, nabarmentzekoa da Aralar eta EAren egoera. Duela bost urteko hauteskundeetan 81.739 boto jaso zituzten bien artean, eta, orain, 54.955. Ezker Batua ere ez dago egoera onean, duela bost urte 37.666 boto jaso bazituen ere, 19.840 jaso baititu orain.
EAJk galdutako boto kopurua ere kontuan hartzekoa da, 2004an jasotako 253.331 botoetatik ia 43.000 galdu baititu. PP ia 239.000 boto izatetik ia 192.000 izatera igaro da. PSOE izan da kalterik txikiena jaso duena. Duela bost urteko 269.000 bototik 6.000 besterik ez ditu galdu.
POSI, Amezketan bozkatuena
Bestalde, hainbat herritan datu ofizialek utzitako emaitza «arraroetan» oinarrituta, mahai askotan «iruzurra» egon dela salatu du II-HEk. Botoak zenbatzean, hainbat lekutan, bere botoak baliogabe edo zuri gisa jaso dituztela emaitza ofizialetan. Eta ez hori bakarrik. Herri askotan, II-HEren botoak beste alderdi batzuen zakuan sartu dituztela ohartarazi dute. Amezketako egoera jarri dute adibidetzat. Ezker abertzaleak gehiengoa du Gipuzkoako herri gipuzkoar horretan. Alkatetza ere badu. Baina ezker abertzaleak babestutako II-HEk ez du boto bakar bat ere jaso, datu ofizialen arabera. POSIren zerrenda, berriz, bozkatuena izan da. 133 boto jaso ditu, orain arteko hauteskundeetan bakar bat ere jaso ez duen arren.
Antzeko «boto aldaketak» egon direla salatu dute,besteak beste, Mungian, Usurbilen, Elgoibarren, Eibarren, Legazpin, Mendaron, Errenterian, Bermeon, Sopelan, Zumarragan, Arrigorriagan, Abadiñon, Mendaron, Tolosan eta Soraluzen. II-HEri milaka boto «lapurtu» dizkiotela.
Antzeko egoerak gertatu dira Euskal Herritik kanpo ere, II-HEk salatu duenez. Gaztela-Leon, Gandia, Madril eta Castelloko gertaerak dituzte adibide. Kasu nabarmenak izanda, oraingoz zenbatu dituzten «galdutako» boto horiek 11.600dik gora direla jakinarazi dute. Eta, horrez gain, herri askotan ez dela II-HEren botopaperik egon. Leon, Caceres, Alacant, Palma, Madril, Ciudad Real, Bartzelona, Vigo eta Coruñatik jaso dituzte, besteak beste, bere mahaietan botopaperik ez dela egon ohartarazteko deiak.
