Egun osoko jaia egiten ari dira Usurbilen (Gipuzkoa), 18. Korrikaren omenaldian. Herritarrek keinua izan dute, gainera, Korrikarekin. Orain hogei bat urte, herriko baserriak-eta berrtzeko diru bilketa egin zuten, eta soberan geratu zitzaien zati bat. Diru hori aurtengo Korrikari ematea erabaki dute.
Edurne Brouard Korrikaren arduradunak egin du ekitaldiko hitzaldia. Euskara ikasleek urteetan egindako ekarpena hartu du hizpide: "Zinez eskertzekoa da denboran eta dirutan egindako ekarpena. Oso handia izan da elkarbizitzari egindako ekarpena". Adierazi du azken urteetan milaka hiztun irabazi dituela euskarak helduen euskalduntzeari esker.
Beste urrats bat egiteko unea badela nabarmendu du, nolanahi ere: "Bada garaia behar diren baliabideak jartzeko eta doakotasunean aurrerapausoak emateko. Botere publikoei euskara babesteko eta bultzatzeko neurriak har ditzaten eskatzen diegu, eta doakotasunaren bidean aurrerapausoak emateko deia luzatzen diegu".
Ekitaldian euskalgintzako ordezkaritza zabala izan da, baita Gipuzkoako Foru Aldundiko eta Eusko Jaurlaritzako ordezkariak ere.
