Euskara sustatzeko neurrien aurkako ildoan, beste urrats bat egin du Carlos Urkijok, Espainiako Gobernuak EAEn daukan ordezkariak. Altzoko Udala (Gipuzkoa) salatu du, euskara plana euskaraz bidali diolako.
Bereziki euskarazko akten aurka jo du orain arte gobernuaren ordezkariak. Beste pauso bat eman du orain, Uema Udalerri Euskaldunen Mankomunitateak salatu duenez: euskara planak euskaraz bidaltzerik ez du onartu.
Agiri ofizialak euskaraz bidaltzerik ez du onartzen Urkijok, baldin eta alboan gaztelaniazko itzulpena ez baldin badute. Eusko Jaurlaritzak txosten juridiko bat egina du esanez euskaraz egiteak berme juridiko erabatekoa duela, euskara eta gaztelania koofizialak direlako eta erakundeen arteko harremanetan bi-biek dutelako balioa.
Uemak ohartarazi du euskara planen aurkako ekinbidea hasten badu udal ugari eramango dituela auzitara Urkijok.
Euskarazko akten auzian kontrako epai bat jaso du asteon Urkijok. Irurako Udalari arrazoi eman dio auzitegiak, esanez aktak euskaraz bidaltzea legezkoa dela.
