Iñigo Urkullu Eusko Jaurlaritzako lehendakariak Bikain Euskararen Kalitate Ziurtagiriak banatu ditu Donostiako Viktoria Eugenia antzokian. Orotara, 39 erakundek jaso dute ziurtagiria; horietatik hamabik goi mailako urrezko Bikain ziurtagiria jaso dute; hogeik, zilarrezkoa, eta zazpik, oinarrizkoa. Kanpo ebaluazio horiek Bikain Ebaluatzaileen Klubeko 138 kidek egin dituzte.
Urkulluk egindako lana aitortu die enpresei, eta euskara sustatzeko berrikuntzak duen garrantzia azpimarratu du: "Etorkizunerako erronka da gero eta enpresa gehiagok euskaraz lan egitea, euskarak presentzia handiagoa izatea administrazioan, kudeaketan eta komunikazio arloan, alegia".
Hirurehun pertsonatik gora elkartu dira ekitaldian, ziurtagirien zazpigarren edizioan. Bikain Kanpo-Ebaluazioak Eusko Jaurlaritzak antolatzen ditu, Euskalit Bikaintasunerako Euskal Fundazioarekin lankidetzan, eta erakundeetan euskararen erabilera, presentzia eta kudeaketa neurtzen dute. Hori horrela, aurten parte hartu duten erakundeek jasoa dute ebaluazio txosten bana beren indargune nahiz zer hobetuen berri zehatza ematen diena, lortutako puntuazio eta horren araberako ziurtagiriarekin batera; hori guztia, lan ibilbide desberdinetako ebaluatzaile talde batek egina, Hizkuntza Politikarako Sailburuordetzaren zuzendaritzapean.
