Ikasturtea hasteko ekitaldi ofiziala egin dute EHU Euskal Herriko Unibertsitatean. Nekane Balluerka errektorearekin batera, han izan dira unibertsitateko kide ugari, bai erakundeetakoak ere; Eusko Jaurlaritzatik, adibidez, Iñigo Urkullu lehendakaria eta Cristina Uriarte Hezkuntza sailburua.
Balluerkak lehen ikasturte hasiera izan du errektore gisa, iazko azaroan hautatu baitzuten errektore. Aldaketa asmo batzuk agertu ditu. Irakaskuntzan, adibidez, "jauzi kualitatibo bat" eskatu du, adibiderako txandakako prestakuntza aipatuta. Ikerketan, finantzaketa handiagoa galdegin du; errektorearen arabera, Europako inbertsioaren parekoa da Arabakoa, Bizkaikoa eta Gipuzkoakoa ikerketan eta garapenean, baina, unibertsitatearen esparrutik begiratuta, Europaren azpitik dago. "Euskal Herrian, beste eragile eta sektore batzuek exekutatzen dute Europan unibertsitateek exekutatzen dutena". Ikerketarako araudi propioa eskatu du, bidenabar.
Horrekin batera, ahalegina egin beharra izan du hizpide Balluerkak: "Hezkuntza publikoak eskubideak eta betebeharrak dakartza". Ikasleei, ikertzaileei eta langile guztiei eskatu die esfortzua. "Gure gizarteak erantzukizun kualifikatua badu unibertsitate publikoarekin, unibertsitate publikoak ere badu betebehar kualifikatu bat gizartearekin".
Urkullu lehendakariak "lankidetza" eskatu du EHU garatzen jarraitzeko. Ikasleak lan arlora gerturatzeaz ere aritu da. Unibertsitate plana datorren urtean amaituko da, eta hurrengoa prestatzen hasiko direla iragarri du Urkulluk.
