Donostian, Aieteko Bakearen Etxean, "Foro Sozial iraunkorra" aurkeztuko dute hilaren 22an, "erakunde eta pertsona ugariren parte hartzearekin", gaur Foro Sozialak berak prentsa ohar baten bidez iragarri duenez. Eguerdi aldera egingo dute ekitaldia.
Hain zuzen, etzi beteko dira bost urte Aieteko Adierazpena plazaratu zenetik, eta foroak uste du han zehaztutako "bide orria erabat baliagarria" dela. "Hori bai, bide orri horrek alde anitzeko blokeoak jasaten dituela gogoratu nahi dugu, bereziki Espainiako eta Frantziako estatuen aldetik. Hala ere, ez dugu etsi behar. Gure iritziz, gizarte zibila ez dago etsipen jarrera batean, eta antolatzen ari da 2013an I. Foro Sozialean onartutako hamabi gomendioak aurrera atera ahal izateko*.
Azken Foro Sozialala –III.a– joan den otsailean egin zuten, armagabetze prozesu bat diseinatzeko, garatzeko eta bururaino eramateko beharraren inguruan. "Pentsatzen dugu, bost urte geroago, Aieteko Nazioarteko Konferentziak diseinaturiko bide orria erreferentzia puntu egokia dela oraindik azken zortzi hilabeteotan Foro Sozial iraunkorra egiten ari den lanketari begira eta, zehazki, ETAren armategien armagabetze eta suntsitzeari dagokienez". Bi estatuei dei egin die "lana erraztera, edo bederen ez oztopatzera".
Brian Currin nazioarteko bitartekariak BERRIAri jakinarazi dio bera ere Aieten izango dela hurrengo larunbatean. Kazeta honek Currinen elkarrizketa bat argitaratuko du bihar, Aieteko konferentziaren 5. urteurrenari buruzko lan zabal baten barruan.
