Espainiako Gobernuak ez dio jaramonik egingo Argentinako justiziari, eta ez ditu estraditatuko frankismoko krimenen harira inputatutako hemeretzi ministro eta poliziak. Argudio gisa, adierazi du Argentinako justiziak ez daukala eskumenik Espainian egindako delituak ikertzeko. Nabarmendu du, gainera, delitu horiek iraungita daudela Espainiako legeen arabera.
NBE Nazio Batuen Erakundeak ez ditu ontzat jo argudio horiek: “Ez dute oinarririk, ez dituztelako aintzat hartzen eta kontra egiten dietelako giza eskubideetako nazioarteko estandarrei”. Delituak ez leudeke iraungita, haren arabera: gizateriaren aurkako krimentzat jo daitezke, eta horiek ez dira iraungitzen.
NBEko lau ordezkarik sinatu dute gutuna: Ariel Dulitzkyk, desagertze behartuak ikertzeko lantaldeko presidenteak; Christof Heynsek, exekuzio estrajudizialei buruzko kontalari bereziak; Juan Mendezek, torturari buruzko kontalari bereziak; eta Pablo de Greiffek, egiari, justiziari eta erreparazioari buruzko kontalari bereziak.
Ohar argia egin diote Espainiari: edo estraditatu frankismoko krimenen erantzuleak, edo Espainian bertan epaitu. “Ez baditu estraditatzen, estatuak obligazioa dauka giza eskubideen eta egia jakiteko eskubidearen urraketa larriak jasan dituztenei justiziarako sarbidea emateko nazioko auzitegietan”.
Oraingo egoeran kaltea biktimek jasaten dutela salatu du NBEk: “Estradizioa onartu ez izanak batere babesik gabe uzten ditu biktimak eta haien senideak, eta justiziarako eta egiarako eskubidea ukatzen die”.
