Zazpi lagun ari dira epaitzen egun hauetan Parisen, eta horietak bat dak Ibon Gogeaskoetxea. Beste auzipetu guztien izenean hitz egin du gaur epaiketan, eta salatu du Frantziak Europako direktiba erabili nahi duela presoak gainetik kentzeko. "Badaki oso ondo lege hori ezartzen badu zer gertatuko den", adierazi du Rajoyk espetxe politika ez duela aldatuko esan zuela gogoraraztearekin batera.
Europako direktiba araudiaren arabera, estatuek presoak batetik bestera aldatzea erabaki dezakete, jatorrikoan bete dezan zigorra. Frantziako espetxeetan dauden Hego Euskal Herriko presoak kasu horretan Espainiaratu egingo lituzkete, baina ez zigorra etxetik gertuago betetzeko, Rajoyren hitzetatik ondorioztatzen denez.
Gogeaskoetxeak presoen kolektiboaren hiru eskaera luzatu ditu epaiketan, lege ezartzea besterik ez dela azpimarratuz: sakabanaketarekin amaitzea, preso dauden 11 gaixoak aske uztea, eta Frantzian espetxean hogei urte baino gehiago daramaten presoak ere aske uztea. Maryvonne Caillibotte epaileak erantzun dio Espainian preso batzuk euren ardurak aitortu dituztela eta onurak jaso eta Euskal Herrira gerturatu dituztela.
Francois Hollande Frantziako presidenteak, ordea, astelehenean Rajoyrekin bildu ostean esan zuen espetxe politika bat duela Frantziak eta "salbuespenik" ez duela egingo ETAko presoekin.
