Funesen perimetroa itxiko dute bihartik

IRUÑEA. Koronabirusaren transmisioa nabarmen larriagotu da Funesen (Nafarroa). Kutsatzea eteteko asmoz, Nafarroako Gobernuak itxiera perimetrala ezarriko du herrian, ostiraletik aurrera.Carlos Artuondo Nafarroako Gobernuko Osasun zuzendari nagusiak gaur jakinarazi du neurria. Itxialdi perimetralaz gainera, baheketa bat eginen dute herrian. Birusa detektatzeko probak egitera deitu dituzte 45 eta 65 urte arteko herritarrak, ostiralerako.

Bestalde, Milagron ostiralean bertan amaituko da itxiera perimetrala; herria martxoaren 26tik dago itxita, positibo tasa handia dela eta. Herriko taberna eta jatetxeek ateak itxita dauzkate ordutik. Horrekin batera, zazpi dira une honetan itxita dauden herriak Nafarroan. Arguedas apirilaren 6an itxi zuten, eta astelehenera arte luzatu da gutxienez itxiera hori. Cadreita hilaren 9an itxi zuten, ostiralera arte. Apirilaren 15ean itxi zituzten, halaber, Arbizu, Etxarri Aranatz, Lodosa eta Alesbes. Intzidentzia tasa handiei erreparatu diete ixtea erabakitzeko.