Gaintxurizketatik Irun arteko zatia bikoiztuko dute

Gipuzkoako Diputazioak 25,3 milioi euro gastatuko ditu N-1 errepideko Gaintxurizketa gainetik Katea arteko zatia bikoizteko. Guztira, 1,7 kilometro izango dira. Lanak ekainean hasiko dira eta 16 hilabeteren buruan amaitu nahi ditu Diputazioak, hau da, 2007ko urrian.

Errepidea bikoizteaz gainera, beste obra batzuk ere egingo dituzte, hala nola Gaintxurizketa gainean biribilgunea egitea, Zaldunborda inguruan lotune osoa egitea eta Kateako sarbidea eraberritzea. Bikoiztuko den errepide zatiaren lehen 400 metroetan gaur egungo errepidearen aldatsa sei metro beheratuko da, %5 baino gehiagoko aldaparik egon ez dadin. Joseba Agirrezabalaga Diputazioko errepide zuzendariaren esanetan, obra bost fasetan egingo dute.