Garoñako zentral nuklearrak zabalik jarraitu ahal izateko aukera irekitzeko eskatu dio Nuclenor enpresak Espainiako Gobernuari. Irailaren 6a baino lehen eskatu behar zion baimena, baina ez zuen hori egin; zerga berriak onartzekoak zituen Espainiako Kongresuak garaitsu hartan, eta Nuclenorrek ohartarazi zuen zerga horiekin ezinezko zela Garoña bideragarri egitea. Epea pasatzen utzi zuen hartara, eta, areago, abenduaren 16an eten egin zuen zentral nuklearraren jarduna.
Uztailaren 6an amaituko da Garoña martxan izateko baimena, eta, "data hurbil dagoela ikusita", baimena luzatzeko eskaria egiteko epea luzatzeko eskatu dio enpresak Madrilgo gobernuari. Horretarako, indarrean dagoen dekretua aldatzeko eskatu dio Industria Ministerioari. Atzo aurkeztu zuten eskaria. Enpresak berretsi du, nolanahi ere, galderak egingo lituzkeela zerga sistema berria ezarrita.
Araba Garoñarik Gabe elkartearen arabera, Endesak eta Iberdrolak “erronka berri bat jo diote” Espainiako Gobernuari. “Bitartean, errusiar erruletara jokatzen ari dira gure bizitzarekin eta segurtasunarekin”. Elkartearen ustez, oso larria litzateke gobernuak eskaria kontuan hartzea. “Multinazional elektriko horien interesei eta nahiei men egitea litzateke”.
Eskaria egin dio Arabako Foru Aldundiari: “Argi eta sendo azal dezala gaiaren inguruan duen iritzia. Hala egiten ez badu, ez lituzke arabarren nahiak eta interesak errespetatuko. Beraz, foru gobernuko kideek dimisioa eman beharko lukete”.
Araban Garoñaren aurkako jarrera argia dagoela esan du EAJk, eta horren buruan jartzeko eskatu dio Javier de Andres ahaldun nagusiari. “Ezin dugu onartu Garoñak irekita jarraitzea. Denok azaldu behar dugu horren aurka”, adierazi du Ramiro Gonzalezek, EAJk Arabako Biltzar Nagusietan duen bozeramaileak. Jeltzaleek galdera bat erregistratu dute Biltzar Nagusietan, De Andresek izango duen jarrera argi dezan.
