Garoña ixteko agindua baliorik gabe uztearen arriskuez ohartarazi dute

Espainiako Gobernuak Santa Maria de Garoñako zentral nuklearra (Burgos, Espainia) 2013an ixteko agindua baliogabetzeko izapideak hasi izana gaitzetsi du Araba Garoñarik Gabe taldeak. «Espainiako Gobernuak arriskuan jarri ditu arabarren bizia eta segurtasuna». Zentral nuklearren aurkako taldearen arabera, erabakiak gutxi batzuen interesei erantzuten die. «Enpresa batzuen interesak jarri dituzte herritarren segurtasunaren gainetik». Gogoratu dute Espainiako Auzitegi Nazionalak berak agindu zuela datorren urtean ixtea. «Ixteko aginduak nahiko argudio ematen zituen». Garoñaren aurka egiten jarraituko du taldeak: «Gure esku dagoen guztia egingo dugu gehiengoaren nahia errespeta dadin».