Joan den astean Arabako hiriburuan izandako txingor ekaitza dela eta, Gasteizko Udalak hondamendi eremu izendatzeko eskatu du gaur. Maider Etxeberria Gasteizko alkateak adierazi du «zaila dela» Espainiako Gobernuak eskaerari erantzutea; izan ere, 2009ko ekaitzaren ondoren ez zuten hondamendi izendatzerik lortu. Legez, izendapen hori lortzeko, hondamendiak «herritarren bizi baldintzak larritu» edota «funtsezko zerbitzu publiko batzuk gelditu» behar ditu. Horren harira, «zuhurrak» eta «errealistak» izateko eskatu die herritarrei.
Alkateak azaldu duenez, txingor eta euri ekaitzak «kalte ugari» eragin zituen Arabako hiriburuko eraikinetan eta ibilgailuetan, uholdeak eta ur putzu handiak sortzeaz gain. Udalaren arabera, 1,8 milioi euroko kostua izango du uztailaren 6an eroritako txingorraren kalteak konpontzeak. Datu horrek ez du barne hartzen zuhaiztiari eragindako kaltea, ezta hiriko argiztapenari egindakoa ere.
Kalteak izandako udal eraikinak konpontzeko lanak «ahalik eta azkarren» egingo dituztela iragarri du Etxeberriak. Tartean daude gizarte etxeak, ikastetxeak eta kiroldegiak. Erabiltzaileen profilaren eta zentroek eskaintzen duten zerbitzuaren arabera erabakiko dute zeintzuk konpondu lehenengo.