Gasteizko mugimendu feministak gaur adierazi du jaietan 11 eraso matxista zenbatu dituztela. Sare sozialetan eman dute berria, eta eraso guztiak gaitzetsi dituzte. Erasoen gehienak txosnetan izan zirela jakinarazi dute, baita bi erasoren ustezko egileak atxilotu dituztela dagoeneko. Guztira, Gasteizko jaietan bost gizon atxilotu dituzte indarkeria matxista egotzita.
Bestetik, Gasteizko Udalak jaien balorazioa egin du. Adierazi dute hiru sexu eraso salatu direla; baita bi eraso homofobo ere, Ikusgune LGTBIfobiaren aurkako behatokiak dituen datuen arabera. Eraso horiek eta lapurreta kopuruaren gorakada izan dira festetako «puntu beltza» Maider Etxebarria Gasteizko alkatearen arabera.
Gainontzean, festak «bikainak» izan direla adierazi du Etxebarriak. Goraipatu du hiria jendez «lepo» egon dela eta «adin guztietako» publikoarentzako ekintzak antolatu dituztela. Egun jendetsuenak abuztuaren 4a eta 7a izan zirela ere esan du. Bestetik, gaineratu du aurtengoak jai «ahaztezinak» izan direla, azken aldia baitzen Gorka Ortiz de Urbinak Zelendonen rola hartzen zuela. Azkenik, alkateak jakinarazi du ostalariak ere «pozik» daudela eta «lan asko» eduki dutela.
Puntu morea Donostian
Donostiako Udalak gaur aurkeztu du Aste Nagusirako puntu morea. Cristina Lage Berdintasun zinegotziak haren funtzionamendua azaldu du: «Bertan salatu ahal izango da eraso edo egoera desatsegin oro». Gehitu du puntua 21 orduz zabalik egongo dela Aste Nagusi guztian, 13:00etatik hurrengo eguneko 10:00etara. Eskaripeko geldialdidun autobus zerbitzuak egongo direla eta segurtasun zerbitzuak indartuko dituztela ere jakinarazi du zinegotziak.
Eneko Goia alkateak sexu erasorik gabeko jai «seguruak» aldarrikatu ditu. Esan du horretarako beharrezkoa dela herritar guztiek parte hartzea: «Adi egon behar dugu edozein erasoren aurrean, eta aktiboak izan behar dugu». Horrelako kasuetarako protokoloa martxan egongo dela era gogorarazi du.
