Gauez tabernan erretzen dela eta, neurriak hartuko dituela esan du Bengoak

Urtebete da Tabakoaren Euskal Autonomia Erkidegoko Legea onartu zutela, baina oraindik ez da erabat betetzen. Eusko Jaurlaritzako Osasun sailburu Rafael Bengoak aitortu du tabernetan erre egiten dutela parrandan; tabernariek erretzaileei utzi egiten diete, sailburuaren hitzetan. Hala, neurriak iragarri ditu hori aldatzeko. Herritarrei ere eskatu die aurre egiteko: «Permisibitate hori ez da mesede bat, eraso bat baizik».

Urtebetean 250 salaketa bildu dituzte erakundeek, tabakoaren legearen harira. Tabernarien kontrakoak izan dira gehienak, bezeroei erretzen utzi dietelako; tabakoa saltzeagatik eta erretzea debekatuta dagoela adierazteko seinalerik ez jartzeagatik ere salatu dituzte; erretzaileen aurka ere jo dute erakundeetara. 250 salaketa jaso arren, Jaurlaritzak ez du batere isunik jarri. Bengoak argudiatu du ez dela «beharrezkoa» izan, oharra eginda «zuzendu» direlakoan arau-hauste horiek. Futbol zelaietan ere erretzea debekatzeko agindua ezartzeko asmoa du Jaurlaritzak.