Araba, Bizkai eta Gipuzkoako Auzitegi Nagusian deklaratuko du Hasier Arraiz Sortuko presidenteak 09:30etatik aurrera, eta Sorturen Kontseilu Nazionaleko ordezkaritza zabal bat bertan egongo da. Sortuk ohar batean adierazi duenez, Arraizen kontrako auziak "agerian uzten du estatu espainarrean ez dagoela adierazpen askatasunik", eta salatu du "disidentzia politikoa" jazarri egiten dutela "erakunde judizial zein polizialek".
"Salbuespenezko tresnatzat" jo ditu Sortuk Guardia Zibila eta Auzitegi Nazionala, "eskubideen ikuspegitik erabat kaltegarriak", eta horiek desagertu behar dutela uste du.
2014eko urtarrilean Euskal Preso Politikoen Kolektiboaren bitartekari taldearen aurkako Xake operazioaren ostean, Herrira-rekin lotutako lau lagun eta hamabi abokatu atxilotu zituen Guardia Zibilak urtebete geroago, Mate deituriko operazioan. Izenekin hitz-jokoa egin zuen Arraizek, 2015eko urtarrilaren 12an, esanaz "herri honek Guardia Zibilari xake-mate egiteko unea" zela.
Dignidad y Justicia elkarteak, Espainiako Gobernuak Araba, Bizkai eta Gipuzkoan duen ordezkari Carlos Urkijok eta Euskal Autonomia Erkidegoko fiskal nagusi Juan Kalparsorok delitu zantzuak ikusi zituzten Arraizen hitzetan.
Arraizek adierazpenak egin zituen prentsaurrekoaren bideoa:
[Youtube]https://youtu.be/M-l-kHq5lbQ[/Youtube]
