Giza katearekiko konpromisoa adierazi dute 123 enpresatako ordezkari sindikalek

ELA, LAB, ESK, Eilas, Hiru eta EHNE sindikatuek bat egin dute Gure Esku Dago mugimenduak ekainaren 8rako antolatu duen giza katearekin. Sindikatu horiek 123 enpresatan dituzten ordezkariak kalera atera dira, euripean, herri ekimenak antolatutako ekitaldietan parte hartzeko deia egiteko.

Ekainaren 8an Durangotik Iruñera egingo den kateak 123 kilometro izango ditu. Horregatik agertu dira 123 enpresatako ordezkariak Bilboko Arriaga Plazan egindako agerraldian; kilometro bakoitzeko, enpresa bateko kideak.

Erabakitzeko eskubidea "eskubide demokratiko eta unibertsala" dela gogoratu dute, aniztasuna eta parte hartzea direla ekimenaren ezaugarriak, eta herritarrak erabakitzeko eskubidearen alde "aktibatzea" duela helburu. "Uste dugu erabakitzeko eskubideari dagokionez honelako dinamiken bidez egingo dugula aurrera", esan dute. Horregatik eskatu dute Gure Esku Dago-k antolatutako ekitaldietan parte hartzeko.