Gizon batek emazte ohia hil eta bere buruaz bertze egin du

Astelehen iluntzean 76 urteko gizon batek 69 urteko emazte bat hil zuen, eta ondoren bere buruaz bertze egin zuen, Miarritzeko Frias karrikan (Lapurdi). Anne Kayanakis Baionako prokuradoreak jakitera eman duenez, aspaldian bikote izan ziren, duela 30 urte inguru bereizi baziren ere. Gizonezkoak hurbiletik egin zion tiro emazteari sabelean, eta ondoren, bularraren kontra jarri zuen, bere buruaz bertze egiteko. Genero indarkeriaren ondorioz aurten Euskal Herrian hildako bosgarren emakumea da Miarritzeko biktima.

Hilketa arratsaldeko zazpiak eta laurden aldera gertatu zen, Miarritzeko hirigunean, hondartza handitik 200 metrora dagoen auzotegian, polizia etxetik hurbil. Lekukoek adierazi zuten bi tiro hots entzun zituztela eta gerturatu zirelarik bi gorpu atzeman zituztela lurrean etzanik. Gizona hilik zegoen, eta emaztea hilzorian. Berehala dei egin zieten sorospen zerbitzuei. Azken horiek emaztea bere onera ekartzen saiatu ziren, baina alferrik. Zauria larriegia zen, eta handik gutxira zendu zen. Udaltzainek inguruko bideak itxi zituzten, ikerketa egin behar zuen Poliziaren zain.

Anne Kayanakis Baionako prokuradoreak argitasun gutxi eman zituen atzo gertakariaren inguruan. Baieztatu zuen gizonak emaztea hil zuela eta ondoren bere buruaz bertze egin zuela, bularrera tiro eginez. Inkesta daraman polizia judizialak azaldu duenez, gizonaren gorpuak hori ematen du aditzera.

Tiroa hurbiletik egin zuen gizonak. «Ehiza fusila baliatu zuen gizonak, kanoi motzekoa», Kayanakisen arabera. Alta, saltegietan ez dago horrelako ehiza fusilik, eta prokuradoreak ez du horren inguruko azalpenik eman. Inkesta dagoen unean egonik, ez dakite berak moztu ote zuen eta zertarako. Motzagoa izanik, inor ohartu gabe aiseago eraman zezakeela soinean nabarmendu zuen Kayanakisek.

Hilketaren arrazoiei dagokienez, horiek finkatzeko goizegi dela azaldu zuen. Gizonaren gorpuan eskutitzak atzeman zituzten. Batzuk Poliziarentzat eta bertze batzuk familiarentzat. Poliziak ez du denborarik izan gutun horiek sakon ikertzeko. Hala ere, gizonaren idatzietan arrangura nagusi dela azaldu du prokuradoreak. Gutunetan familiako hainbat kideri idatzi diela dirudi, baina deusek ez du aditzera ematen zein izan daitekeen hilketaren arrazoia.

Hilketaren abiapuntuan gizonaren jarrera jeloskorra egotea ez du baztertzen Kayanakisek. «Duela 30 urte banandu ziren, eta zaila da sinestea hainbeste denbora pasatu eta gero, adin horretan, jeloskortasuna izan daitekeenik hilketaren arrazoia, baina ez dugu ikerketa lerrorik baztertzen». Ezkontzak iraun bitartean, bi haur ukan zituen bikoteak.

Segadaren hipotesia ahul

Hilketa gertatu eta berehala, zurrumurruak ugaldu ziren; horien artean, beste pertsona bat ikusi zuten lekukoen testigantza. Lekuko batek adierazi zuen burua estalita zeraman gizon bat ikusi zuela, Frias karrikatik lasterka alde egiten. Poliziak lekuko guztiak eta auzokideak galdekatu ditu, eta hipotesi hori baztertu behar dela adierazi zuen Kayanakisek. Urduritasunean egindako adierazpena dela erran du. Gizonaren gorpua agertu den moldean, suizidioaren tesia sinesgarriena dela dio prokuradoreak. Gutunen edukiak interpretazio hori indartzen duela gaineratu du, gainera.

Hala ere, puntu bat ez da argi gelditu gertaera horretan. Gizonezkoa Miarritzen bizi zen, Frias karrika dagoen auzotegian. Emaztea, aldiz, Angelun bizi zen. Prokuradoreak ez daki oraindik zergatik joan zen emaztea gizonarengana.

Galdera horiei erantzuna emateko asmoz, gizonaren eta emaztearen etxeak miatu ditu Poliziak, baina hilketari argia eman diezaiokeen deus ez aurkitu gabe. Prokuradoreak ez ditu jakitera eman gizon eta emaztearen izenak.

Poliziak hildakoen familia eta lagunak galdekatu nahi ditu. Lan horretan traba guztiak baztertu nahi dituela azaldu du Kayanakisek, baita ere gizartean zabal daitekeen presioa. «Emazteak ez zuen gizonaren aurkako salaketarik jarri, ez ezkonduta egon zirelarik, ez gero». Gizonak ez zuen tratu txarren salaketarik izan, ez emakume horrekin ezkonduta egon zen sasoian, ez eta banandu ondoren ere.

Puntuz puntu

AURREKO HILDAKOAK

Astelehenean Miarritzen jazotako heriotzaren aurretik, beste lau andrazko hil dira aurten bikote, bikotekide ohi edo semeek hilda. Hona aurreko kasuak:

Elena Cal. Genero indarkeriaren ondorioz hildako lehendabiziko emakumea izan zen. 45 urte zituen, eta ustez bikotekide ohiak hil zuen, Tolosan (Gipuzkoa), urtarrilaren 17an.

Amelia Sanchez. 65 urteko emakumea. Ustez semeak hil zuen, Barakaldon (Bizkaia), iragan otsailaren 8an, labankadaka. Bereizi ostean etxera gurasoengana itzulia zen semea.

Isabel Velez. 48 urteko andrea. Ustez semeak hil zuen, labankadaka, Lasarte-Orian (Gipuzkoa), otsailaren 19an.

Amelia Amaya. 48 urteko emakumea. Bilboko Txurdinaga auzoan hil zen, uztailaren 25ean. Berehala atxilotu zuten bikotekidea, heriotzarekin lotura izan zezakeelakoan; haren ama eta anaia ere atxilotu zituzten, delitua ezkutatzen saiatzea egotzita.

Emaztea hil zuela onartu du Alain Bossuetek epaiketan

Alain Bossuet baionarrak ez du deus ukatu atzotik Pauen egiten ari diren Assissetako auzian. Lilian Nard emaztea hil zuen etxean, 2007an. Epailearen aitzinean hilketari buruzko xehetasun guztiak eman zituen, sentiberatasun edo erru arrastorik agertu gabe. Bossuetek ez du sekula ukatu bikotekidea hil izana. Biak ziren ezinduak, eta bikotea garbigelara eraman, bainuontzian sartu eta labankadaz hil zuen, lepoa moztuz.Auzipetuak eritasun psikikoa nabarmendu nahi izan du, baina epailearen galderek aitortu arazi diote etxetik hartu zuela emaztea hiltzeko aiztoa. Gaixotasuna nabarmenduz, espetxe zigorra erietxean pasatzeko aukera ukanen zuela pentsatu du Bossuetek.

Lau herritarretatik batek genero indarkeria hurbil dauka

EB Europako Batasuneko datuen arabera, lau herritarretatik batek genero indarkeria kasuren bat hurbiletik ezagutzen du. Europako Batzordeko Justizia eta Oinarrizko Eskubideen komisario Viviane Redingek asteon esan du genero indarkeriak aparteko lekua izango duela berdintasunaren aldeko estrategian.

Telefonoak

Badira hainbat telefono zerbitzu bereziki genero indarkeria jasaten duten emakumeentzat. Honakoak dira:

900-84 01 11. Eusko Jaurlaritzako genero indarkeriaren biktimen arretarako zenbakia da.

016. Espainiako Gobernuak kudeatutako zerbitzua eskaintzen dute.

Gizon bat kartzelan da sexu eraso bat egitea leporatuta

Gasteizen ertzainek 28 urteko gizon bat atxilotu zuten astelehenean, 14 urteko neska bati sexu erasoa egitea egotzita; epaileak espetxean sartzeko agindu du. Familiak lagunduta jarri zuen salaketa neskak, igandean, abusuak aspalditik zetozela azalduz. Neska eta ustezko erasotzailea etxe berean bizi ziren.

Neska-laguna jotzeagatik, 20 urteko gazte bat atxilotuta

Bilbon ertzainek astelehen arratsaldean 20 urteko mutil bat atxilotu zuten, neska-laguna jotzea egotzita. Bikotekideak 16 urte ditu, eta, ertzainen arabera, erasotzaileak kolpeak eman zizkion buruan. Ertzainek erasoa ikusi eta berehala atxilotu zuten gaztea, genero indarkeria leporatuta.

Bortxaketa saio batengatik, guardia zibil bat auzipetuta

Gipuzkoako Auzitegiko Fiskaltzak hamar urteko kartzela zigorra eskatu du Intxaurrondoko (Donostia) kuartelean jardundako guardia zibil baten kontra; 12 urteko neskato bat bortxatzen saiatzea egozten diote, eta 11 urteko beste neska bati sexu ukituak egitea. Salatutako jazoerak 2007an gertatu ziren, baina, nesken arabera, aurretik ere hainbatetan sexu ukituak egin zizkien. Konfiantzazko harremana zuen guardia zibilak haurrekin eta beren familiekin, eta, salaketen arabera, hori baliatzen zuen umeei ukituak egiteko. Egun hauetan ari dira egiten ustezko erasotzailearen aurkako epaiketa. Auzipetuak ukatu egin du haurrekiko harremanetan sexu grina asetzen saiatzen zela.