Guantanamoko atxilotze eremua berehala ixteko aholkatu du NBEk

NBEren txostena ez dute oraindik ofizialki aurkeztu, baina nazioarteko agentziei filtratu zaienez, Guantanamoko presoei oinarrizko eskubideak ukatzen zaizkiela eta, gainera, torturak jasaten dituztela esaten da idatzian. Hori dela eta, atxilotze zentroa berehala ixteko aholkatu dute Nazio Batuetako adituek.

Batetik, Guantanomoko presoak oraindik epaitu gabe eta ohiko auzipetze prozeduretatik kanpo daudela salatu dute txostenaren egileek, eta, besteak beste, beren defentsako abokatua aukeratzeko eskubidea ukaten zaiela gogorarazi dute.

Bestetik, eguneroko bizitzan presoek torturak jasaten ditutela diote Nazio Batuetako adituek: luzaz bakartuta edukitzen dituztela, biluzarazi egiten dituztela, muturreko tenperaturetan edukitzen dituztela, txakurrekin mehatxatzen dituztela, eta gose grebaren hautua egin dutenak derrigorrez elikatzen dituztela —sudurreko zunden bidez—. Praktika horiek guztiak aldi berean gauzatuta tortura direla nabarmendu du txostenak.

Arestian aipatu bezala, NBEko giza eskubideen arloko bost adituk egin dute azterketa, Giza Eskubideen Batzordeak aginduta, eta 18 hilabetez Guantanomoko preso ohiak, abokatuak eta senideak elkarrizketatu dituzte. Aditu horiek ez dira inoiz atxilotze zentroan izan: uko egin zioten hara joateari AEBetako Gobernuak debekatu egin zielako presoekin hitzegitea.

Hain justu,Washingtonek hutsune horri heldu dio Nazio Batuen txostena kritikatzeko: egileak Guantanamon egon ez direnez ez duela zilegitasunik iritzi dio Etxe Zuriak. George Bush AEBetako presidenteak bilera izan zuen atzo Kofi Annan NBEko idazkari nagusiarekin, eta txostenarekin suminduta zeudela jakinarazi zion batzarrean.