Gure Esku-k «herri harrotasuna» erakutsi nahi du Korrikak iraun bitartean ere. Hala, zenbait ekintza antolatu ditu datozen egunetarako. Lehena bihar bertan izango da: Irun (Gipuzkoa) eta Hendaia (Lapurdi) arteko Santiago zubian «ikurrinen tunela» sortu nahi dute, eta, horretarako, ikurrinak eta Nafarroako banderak banatuko dizkiete joaten direnei: «Ikurren uholdea sortuko dugu hamar egunean, Korrikak gure errepideak zeharkatuko dituen bitartean».
Gure Esku-k biharko ekintzan parte hartzeko deia egin die herritarrei, eta izen emateko webgune bat ere prestatu dute:izenamena.gureesku.eus. Leku berean eman dezakete izena martxoaren 24an Baionako Mayou zubian egin nahi duten ekintzan parte hartu nahi dutenek ere. Hain zuzen, egun hartan, Gure Esku-ko kideek hartuko dute lekukoa Paulmy etorbidean.
Gure Esku-k jakinarazi duenez, ez dute Baionan soilik hartuko lekukoa; hala egingo dute Tuteran (Nafarroa), Trebiñun (Araba), Zallan (BIzkaia) eta Tolosan (Gipuzkoa) ere. Gainera, «ikurrin eta bandera nafar erraldoiak» jarriko dituzte Korrika igaroko den zenbait lekutan.
🏃🏻♀️BADATOR KORRIKA!🏃🏻
— Gure Esku (@gure_esku) March 13, 2024
Bihar hasiko da ikurren uholdea Irunen. Santiago Zubian ikurrin eta nafar banderen tunela osatuko dugu.
Animatu eta eman izena materiala kalkulatzeko: https://t.co/ToVndslYNR
Ikur uholdea sortzera goaz!🌊 pic.twitter.com/4B4aRaWyYM