Hamaikabat alderdia (H1) ez da aurkeztuko maiatzeko udal eta foru hauteskundeetara. Hala erabaki dute gaur Donostian egin duten ohiko batzarrean. Bi aukera zituzten eztabaidagai: ez aurkeztea eta inoren alde botorik ez eskatzea, edota ez aurkeztu baina EAJren alde botoa eskatzea. Azken aukera honen alde egin dute batzarkideen %75ek.
H1-eko udal ordezkari izandako batzuek dagoeneko hartu zuten erabakia EAJren udal zerrendetan joateko: Jose Mari Burgosek Errenterian –bederatzigarren– eta Jaione Arratibelek Donostian –azkeneko postuetan–. Eibarren H1-eko 2011ko alkategai Mertxe Garate ere EAJren taldean aurkeztuko da –hirugarren–. Pasaian edota Lasarte-Orian ere bidean dira beste batzuk. 2012an, berriz, Eusko Legebiltzarrerako hauteskundeetan Hamaikabateko kide esanguratsu askok Iñigo Urkullu EAJko lehendakarigaiaren aldeko botoa eskatu zuten.
2009an Iñaki Galdosen-eta ildokoak EAtik atera, eta hauteskundeetara lehen aldiz 2011ko maiatzean aurkeztu zen Hamaikabat: udal eta forukoetan, Gipuzkoan baino ez —Araban, EAJren zerrendetan sartu ziren haren kideak—. Emaitza "txarrak" lortu zituen, aitortu zuten bezala: foru bozetan 8.662 boto (%2,58; zazpigarren indarra) eta batzarkiderik ez, eta udalekoetan, 9.270 boto (%2,75, seigarren) eta hamabi zinegotzi (Astigarraga, Hernani eta Usurbilen bina, eta Azpeiti, Beasain, Hondarribi, Legazpi, Oiartzun eta Urretxun bana).
2007an EAk, bakarrik aurkeztu zenean, Gipuzkoan 91 udal hautetsi (30.526 boto, %10,19) eta zazpi batzarkide (34.149 boto, %13,28) eskuratu zituen, bosgarren indarra izanik.
