Hamalau eguneko berrogeialdia «luzeegia» izan daitekeela adierazi du gaur goizean Olivier Veran Frantziako Osasun ministroak. Bere arabera, Frantziako Kontseilu Zientifikoa horren alde legoke. Gaur egun, koronabirusak kutsatutako gaixoekin kontaktuan egondako pertsonek hamalau egunez itxialdian egon behar da, beste nehor ikusi gabe; epe hori zazpi egunera apaldu nahiko lukete. Frantziako Osasun ministroak uste du gisa horretara herritarrek neurriarekiko atxikimendu hobea izanen dutela. «Ohartu gara gaur egun anitzek ez dutela epe hori errespetatzen».
Veranek zehaztu du neurria ez dela «ekonomiari lehentasuna» emateko; «kutsagarriagoak gara lehen bost egunetan; sintomak agertu ala testean positibo eman eta bost egunera. Ondoren, kutsagarritasuna apaltzen da biziki fite. Aste baten buruan biziki apala da».
Ostiralean Defentsa Kontseilua bilduko du Frantziako Gobernuak, eta orduan hartuko dute erabakia. Veranek adierazi du ordurako beste aditu batzuen iritziak ere bilduko dituztela.
