Abereak legez kanpoko produktuekin hazten zituztelakoan, hamalau lagun atxilotu zituen Guardia Zibilak joan den astean Aragoin, Espainian. 2014an hasi zuten ikerketa, eta, Poliziaren arabera, horrelako 1,3 tona haragi saldu dute.
Ikerketak ia bi urte iraun du, eta tarte horretan haragi "pozoitu" hori saltzen utzi izana salatu dute Enba eta EHNE sindikatuek. "Arduragabe" jokatzea egotzi diete erakundeei. Haragia nora joan den argitzeko eskatu dute.
Salatu dute Espainian "ohikoa" dela jardun hori. Euskal Herrian "kontrol sistema zorrotzak" daudela nabarmendu dute, eta horrelakoak saihesten direla hala. "Ez dugu inor engainatzen eta pozoitzen".
Herritarrei eskatu diete haragia erostean erreparatzeko etiketari.
