Hogei abesti berri, fresko eta dantzagarrik osatzen dute Ene kantak CD-DVDa. Urriaren 4an eta 5ean kioskoan erosi ahal izango da BERRIArekin, hamabost eurotan. BERRIAlagunek eskaria egin dezakete, eta etxean jasoko dute (943 30-43-45 edo berria.eus/kioskoa).
Herri kantak moldatu eta gaurkotu dituzte hainbatetan; guztiak itsasoaren gaineko hitzekin egin dituzte. Gainera, haurrek erraz imitatzeko moduko koreografiak asmatu dituzte, DVDan ikus daitezkeenak. Abesti bakoitzak bideoklip bat du.
Kantak euskal kultur, kirol eta gizarte arloko pertsona ezagunek abestu dituzte, eta bideoklipetan ere parte hartu dute. Parte hartzaileen artean daude Fermin Muguruza, Ruper Ordorika, Mikel Urdangarin, Imanol Ubeda, Hesian taldeko Zuriñe eta Fran, Drogas, Kutxi Romero, Manolo Garcia, Igor Ijurra, Alaia Martin, Oinatz Bengoetxea, Abel Barriola, Jon Apezetxea, Nagore Arizaga, Ana Isabel Martinez, Silvia Ederra, Oier Sanjurjo, Asier Riesgo, Markel Bergara, Imanol Agirretxe, Gorka Iraizoz eta Mikel San Jose.
Horiekin batera, Euskal Herri osoko hamabi ikastetxetako haurrek parte hartu dute egitasmoan, 500 haur, orotara. Bideoetan eta CD-DVDaren azalean agertzen diren irudiak Kukuxumusuk egin ditu.
Proiektuarekin lortzen den etekinaren erdia Euskalerria irratiarentzat izango da; beste erdia, berriz, Ene Kantak-en hurrengo proiektua finantzatzeko. Euskalerria irratia Iruñerriko irrati euskaldun eta independentea da, Iruñerrian fisikoki sakabanaturik bizi diren 30.000-35.000 euskaldunentzat kohesiorako tresna garrantzitsua. 26 urte daramatza dialean lizentziarik gabe, Nafarroako Gobernuak behin eta berriz ukatu diolako. Proiektu berriak gauzatu ahal izateko, finantzaketa behar du.
