Hezkuntzako eta suhiltzaileetako lan eskaintza publikoak airean egon dira azken asteetan Nafarroan, Espainiako Estatuaren abokatuak helegitea jarri baitzuen deialdiaren kontra. Zehazki, gatazka zeukaten 2014ari zegozkion lanpostuekin; UPNren gobernuak gorde egin zituen postuak, eta gobernu berriaren asmoa zen oraingo deialdian ateratzea. Madrilen arabera, ordea, hori ez da legezkoa.
Azkenean, 2014ko postuak ez ateratzea erabaki du Iruñeko gobernuak. Maria Jose Beaumont kontseilariak adierazi du lan eskaintza osoa zegoela arriskuan —378 lanpostu—, eta 2014koak 91 zirela. Horiek kendu egingo dituzte. “Horrela, 287 lanpostu salbatuko ditugu”, nabarmendu du kontseilariak.
Suhiltzaileen lanpostuei dagokienez, 30 lanpostu zeuden airean, eta atera egingo dituzte.
Nafarroako Gobernuak ontzat jo du akordioa. “Sindikatuen artean erabateko adostasuna egon da, soluziorik onena delako, gaia argitu dugulako, eta lan eskaintzak egiteko atea zabaldu delako”. Beste lan eskaintza batzuk egiteko ere aukera ekarriko du akordioak, gobernuaren arabera.
