Irakasle postua lortzeko azterketak ez dituzte datorren urtean egingo Nafarroan, baizik eta 2019an. Hezkuntzako mahai sektorialeko bilera egin dute, eta han eman du aldaketaren berri Nafarroako Gobernuak. 73 postuko lan eskaintza egitekoa du Hezkuntza Departamentuak. 2018an egitea nahitaezkoa zela azaldua zuen orain baino lehen. Zirrikitu bat hartuko du orain: deialdia, bai, 2018an egingo du, baina azterketak, 2019an.
Sindikatu eta irakasle talde batzuek eskatua zuten aldaketa hori. Haur eta Lehen Hezkuntzako oposizioak izango dira. Irakasle talde horien kexua zen 2018an Nafarroan bakarrik egingo zituztela azterketak, eta horrek "dei efektua" eragingo zuela: beste leku batzuetatik joango zirela azterketak egitera Nafarroara. 73 lanpostuko eskaintza dute oraingoz, eta aztertzen ari dira zenbat gehiago atera ahalko dituzten 2019rako.
Beste aztergai bat ere izan dute mahai sektorialean: zerrenda bakarra. Laukotean eta parlamentuan azaldu zuen eran, Maria Solana kontseilariak sindikatuei azaldu die "legezkoa" dela zerrenda bakarra ezartzea, eta aztertzen ari direla nola kudeatu. Gehiengo sindikalak babestu egin du zerrenda bakarra: ELAk, LABek eta Steilasek.
