Hipotekaren ordainetan etxea ematea onartu du Nafarroako Parlamentuak

Baliabiderik ez duten pertsonek etxea emanda hipoteka kitatzea onartu du Nafarroako Parlamentuak, Espainiako Gobernuaren proposamena bere eginda. UPNk, PSNk, NaBaik eta PPk egin dute neurriaren alde; Bilduk eta Ezkerrak abstentziora jo dute. Dirurik ez daukatenei laguntzeko neurrien barruan proposatu zuen hipotekaren ordainetan etxea ematea Madrilgo gobernuak; hipoteka moldatzea eta interesak jaistea ere jarri zuen mahai gainean. Nafarroako Gobernuak babestu egin du neurria; Alvaro Miranda Ekonomia kontseilariak alde bozkatzeko eskatu zien atzo parlamentariei, nafarrak espainiarrak baino «baldintza txarragoetan» ez egoteko.

UPNko eta PPko parlamentariek erabat babestu zuten proposamena, eta alde bozkatu zuten; baietza eman zuten NaBaik eta PSNk ere, legea motz geratzen dela iritzi badiote ere. Bilduk eta Ezkerrak abstentziora jo zuten: Bilduk salatu zuen Nafarroan bertan neurriak hartzeari uko egin diola gobernuak; Ezkerrak dio «erabateko porrota» izango dela neurria.