Hiru enpresa talde lehiatuko dira Zubietako errauste planta egiteko

Hiru enpresa taldek aurkeztu dizkiote Gipuzkoako Hondakinen Partzuergoari haien proposamenak Zubietako errauste plantaren proiektua egiteko. Atzo amaitu zen epea, eta hauek aurkeztu dira: FCC, Serbitzu Elkartea, Altuna y Uria eta AE&E Inova AG enpresek osatutako Aldi Baterako Elkartea; Befesa Agua, Thyssenkrupp Xervon Energy, GMBH VAT, Befesa Gestion de Residuos Industriales, Novergie, Construcciones Galdiano eta Antzibar enpresek osatutakoa; eta Sener, LKS (MCC) eta Construcciones Amenabarrek osatutakoa.

Egun errauste plantara iristeko errepidea egiten ari da Altuna y Uria enpresa, eta laster errauste planta kokatuko den plataforma egiteari ekingo dio Construcciones Moyuak.

Orain, proposamenak aztertu, eta urtearen hasierarako lanaren ardura zeini eman erabakiko du Hondakinen Partzuergoak. Zubietako hondakinak kudeatzeko zentroa egiteko 320 milioi euro inguru beharko ditu Hondakinen Partzuergoak. Horretarako, mailegu bat eskatu dio Europako Inbertsio Bankuari. Banku horrek onartua du 195 milioi euroko mailegua, eta orain Zubietako plantaren inguruko azterketa bat egiten ari dira hainbat aditu, Bankuak eskatuta.

Greenpeacek berriki jakinarazi zuen bankuak atzeratu duela dirua emateko erabakia proiektuaren azterketa bat egin arte. Partzuergoak ukatu egin zuen hori, eta mailegua jasotzeko orduan ere epeak beteko direla ziurtatu du.

Zerrenda

1. ENPRESA TALDEA

FCC SA

Serbitzu Elkartea SL

Altuna y Uria SA

AE&E Inova SA

2. ENPRESA TALDEA

Befesa Agua SAU

Thyssenkrupp Xervon Energy GMBH, VAT

Befesa Gestion de Residuos Industriales SL

Novergie SA

Construcciones Galdiano SA

Antzibar SA

3. ENPRESA TALDEA

Sener Ingenieria y Sistemas SA

LKS Ingenieria (MCC)

Construcciones Amenabar SA