Izugarrizko Europako Liga egin du Athleticek, baina ez du titulua irabazi. Edo alderantziz esan daiteke: ez du irabazi, baina txapelketa bikaina egin du.
Txapeldunordearekin inor ez da gogoratzen, esaten da finalen aurretik. Orokorrean ez; norbera, bere ibilbidea oroitzean, bai. Athletic berriz ere Europako txapelketa bateko final batean izan da, 35 urteren ondoren. Orduan, 1977an, UEFAkoa jokatu zuen, Juventusen aurka, eta galdu egin zuen. Baina Athleticekoek gogoan dute. Orain Europako Ligakoan aritu da, Bukaresten, Atletico Madrilen kontra, galdu egin du (3-0), baina hori hor dago, bigarren izan da.
Athleticek, besteak beste, Manchester United, Schalke 04 eta Sporting Lisboa kaleratu ditu Europako Ligan. Ezin da ahaztu.
