Iñaki Goirizelaia Euskal Herriko Unibertsitateko errektoreak gaur goizean berretsi egin du ez dutela errepikatuko selektibitateko Kimikako azterketa. Atzo banatu zituzten ikasleen notak, eta aurreko urteetakoen antzekoak direla esan du. Azterketa egin zuten bi ikasletik batek ez dute gainditu, eta batez besteko nota 4,56koa izan da. Selektibitatea egin dutenen %95,96k gainditu dute unibertsitaterako sarbide proba.
Goirizelaiak Euskadi Irratiari esan dio galdetutako eduki guztiak selektibitatearen programan zeudela. Ikasle guztien eskubideak bermatu behar direla esan du, eta ez dagoela Kimikako proba berriro egiteko arrazoirik. Kimikako azterketako arazoak aintzat hartuta, Kimikako azterketa bi aldiz zuzentzea erabaki zuten, eztabaidagai den galderarekin eta hori gabe, eta bi modu horien artean nota onena ematen duena jartzea ikasle bakoitzari.
