Iberiako sindikatuek ez dute xehetasunik eman, eta azaldu dute bitartekariaren neurriak aztertu egin behar dituztela lehenik eta gero berriro elkartuko direla harekin. Jose Luis Romero Iberiako Giza Baliabideetako zuzendariak azaldu duenez, zuzendaritzak eta sindikatuak bihar elkartuko dira bitartekariarekin. Hamar orriko dokumentu bat aurkeztu diete, Antonio Escobar Sitcpla sindikatuko presidentearen arabera.
Otsailaren 18tik 22ra egin zuten aurreko greba langileek; aste honetan ere ari dira, eta martxoaren 18tik 22ra egitekoak dira. Zuzendaritzaren lehenengo asmoa 3.807 lagun kaleratzea zen.
