Ikasle gehiago sartuko dituzte Nafarroako ikasgeletan. Nafarroako Gobernuak sindikatuei jakinarazi die orain baino bi ikasle gehiago sartu beharko dituztela Haur Hezkuntzako, Lehen Hezkuntzako eta DBH Derrigorrezko Bigarren Hezkuntzako geletan. Honako hauek izango dira kopuruak:
Haur Hezkuntza (3 urte): 25 ikasle (orain bezala).
Haur Hezkuntza (4 urte): 26 ikasle (+1).
Haur Hezkuntza (5 urte): 27 ikasle (+2).
Lehen Hezkuntza: 27 ikasle (+2).
DBH: 32 ikasle (+2).
Batxilergoa: 35 ikasle (orain bezala).
Joan den astean Jose Iribas Hezkuntza kontseilariak iragarri zuen "kasuz kasu" aztertuko zutela ikasleen gehieneko kopurua handitzea. Ez da hori sindikatuei igorri dien txostenean ageri dena. Bihar dute bilera sindikatuek eta Iribasek, baina, txosten horien bitartez, murrizketen erabakiak jakinarazi dizkiete jada langileen ordezkariei.
Aurrez iragarritako neurri bat hartuko duela berretsi die gobernuak: irakasleek bi eskola ordu gehiago izango dituzte astean. Denbora gutxiago izango dute beste jardunetarako (tutoretzak, zuzenketak...). Orduak gehituta eta ikasle gehiago pilatuta, ehunka irakasle kanporatuko dituzte.
Beste neurri bat ere jakinarazi die Iribasek: lansari osagarriak nabarmen jaitsiko dizkiete langileei. Mintegietako buru ari direnen sariak jaitsiko dira, besteak beste. Ordea, bada pizgarri berri bat: TIL hizkuntzen trataera integratua ezarri duten eskoletako ikasketa buruei beste ordainsari bat emango diete.
